Prome minister Evelyn Wever-Croes a anuncia den un conferencia di prensa cu pa aña 2020/ 2021, lo tin enseñansa avansa pa hoben cu limitacion cu ta caba Dun’un Man, pa asina nan por ta miho prepara den comunidad.
El a splica cu for di algun luna pasa a institui un comision cu lo traha riba inclusion. E tema a bin dilanti unda cu ta trahando riba un plan riba termino corto pa cosnan cu ta mas urgente, entre nan, ‘enseñansa avansa pa nos hoben special’.
Den cuadro di preocupacion cu tin na Aruba pa persona cu limitacion cu ta caba na Scol Dun’un Man y no tin un enseñansa mas avansa cu nan por sigui despues. E mandatario a bisa cu tin termino mediano y termino mas largo, pero a opta pa e termino corto.
“Ora cu e hobennan aki bay cas, tur loke nan a siña ta bay perdi, pasobra no tin edad suficiente pa nan bay traha of ta cay den e circulo di Trampolin Pa Trabou. Anto nan ta hoben, nan por sigui cu scol”, el a expresa.
Pa e motibo aki, Wever-Croes a splica cu for di algun tempo ta buscando cual ta e miho opcion cu lo bin cune, den deliberacion cu fundacion cu ta cay bou Minister di Asunto Social, Glenbert Croes (MEP). Nan a bay cerca Verstandelijk Gehandicapten Aruba (SVGA) pa traha y yega na enseñansa avansa pa hoben cu limitacion.
Esunnan cu caba scol, no mester di bay cas, pero por sigui nan estudio pa despues por drenta mercado laboral. Cu guia y asistencia nan por traha tur trabou cu tin na Aruba, e mandatario a remarca.
“Tin algun comerciante cu tin varios di hoben cu limitacion ta traha cu nan. Tin algun cu no por traha unda tin hopi hende, mucho desorden, pero nan tin habilidad pa haci otro cosnan”, Wever-Croes a splica.
Pa e motibo ey ta importante pa traha riba e parti di enseñansa avansa pa nos hobennan. Sinembargo, el a agrega cu ta di lamenta cu no por keda cla pa aña escolar 2019/ 2020 ‘pasobra ta tuma tempo’.
Un realidad cu lo bira ora e muchanan por sigui cu nan scol. “Pa e grupo cu a caba e aña aki, Minister Glenbert Croes a regla un manera pa nan tin un caminda di bay cu tin curriculum bou guia di Hans Geerman, pa yega na un solucion structural cu lo bin despues.”
Pa finalisa, e mandatario a bisa cu e muchanan cu limitacion merece e oportunidad y ta deber di nan pa brinda nan esey. Mirando cu Social Crisis Plan tabata pa esunnan vulnerabel y e grupo aki ta mucha vulnerabel, ‘tin compromiso cu nan’.
This content was originally published here.