Ai ba ka snam kan tuid ha madan, la dei ban pyni da ka kam:JSU

Shillong: U President rangbah jongka Jaintia Students’ Union (JSU) u Samla Lawyerson War, ha ka jingpyllait khubor mynta ka sngi u la krenshai da kaba tyngeh ba kum ki dkhot jongka seng kim dei satia tang ki nongpeitkai halor ka jingshah nion bein bad jingshah iuhroit ki paradoh ki para snam ha kiwei pat ki jait bynriew ha la ka jong ka Ri. “Hynrei ngi kynmaw ba ngi la bamsmai ruh shwa ba ngin rung sha ka seng ban mih shakhmat ban iada iaka Ri bad ka Jait bynriew” ong ka kyrwoh.

Kumta, halor kine ki jingiakynad kiba la kynshoit bad pynmih da ki briew kiba kwah ban shim kabu ia ka jinglui lui bad ka jingtip briew tip Blei jongka jait bynriew jongngi, na ka liang ka Seng ka kwah ban pathai shai ia kane ka khubor ba ka seng JSU ruh kan ym shong kli kti, lane ban bynda iala ka jongka Ri bad ka jait bynriew, hynrei kan iengskhem ha la ka jong nongrim, namar ka dawbah jongka Ri bad ka jinglong ba kyrpang jongka jaitbynriew.

“Ai ba ka snam kan tuid ha madam namar ka jait bynriew, ngin ym salia shuh namar ngi la dep mad shibun ki jingeh bad ngi laduh bun tylli ki mynsiew ieid Ri jongka jait bynriew ha kti jongki poiwir shi sngi” kren rangbah u president jongka Seng.

“Ai ba ki briew bad ka pyrthei kan tip ba ka jingshah pyniap iong u wei naki dkhot jongka jait bynriew u ba dei u member jongka KSU ha Ichamati ka long thik kum u nam sarang ba dung ia u dohnud jongka jait bynriew bad halor kane ngin ym lah satia ban sngap jar jar lane ban khaprip ia ki khmat, hynrei ngi dem ngon ban wad ia ka daw bad kane hi kan dang iaiphrang shuh shuh iaka mynsiew ieid Ri bad ka jingiatylli ka jongngi” ong U bah Lawyerson.

Haoid ka JSU ka lah ban iapher ha ka kyrteng kum kawei naki sengbhalang hapoh ka Ri bad ka jait bynriew, hynrei ka long pat kawei ka doh kawei ka snam naka bynta ka jait bynriew, bad namar katta, ka jingshah maham bad ki jingshah kynnoh jongka KSU ki long kiei kiei kiba ym lah ban pdiang da lei lei ruh em.

Kumta, halor kane ka dawbah ka dawsan, ka seng ka kren shai ba ka la long kaba la pynkhreh, bad kiwei pat ki jaitbynriew (Bangladeshi Bengali) kiba don daw bad ngi, kin long lpa kiba la pynkhreh ban mih noh na kane ka Ri bad ka kyndew ka Shyiap ka jongngi, ka Ri umsnam u ni U Ma.

“Kyntang iawai shwa ba ka por kan dier ngi khot bad kyrpad lang ia baroh ki paid jongka Ri bad ka jaitbynriew jongngi naduh ki sengbhalang bapher bapher bad iwei pa iwei i dkhot jongka jait bynriew ban ieng tylli kawei na ka bynta ka pateng jongngi kaban dang wan hadien” pynkut ka khubor.

Like Our Facebook Page